प्रतिनिधि :संदिप ढाकुलकर (शिक्रापूर पुणे)
भीमा कोरेगाव विजयस्तंभ कार्यक्रमासाठी वाहतूक बदल
चाकण, शिक्रापूर, वाघोली मार्गांवर निर्बंध
भीमा कोरेगाव येथील विजयस्तंभ परिसरात होणाऱ्या विजयस्तंभ कार्यक्रमाच्या पार्श्वभूमीवर कायदा व सुव्यवस्था अबाधित राखण्यासाठी पिंपरी-चिंचवड वाहतूक पोलिसांकडून 31 डिसेंबर 2025 ते 1 जानेवारी 2026 या कालावधीत शहर व ग्रामीण भागातील प्रमुख महामार्गांवर व्यापक वाहतूक
पुढीलप्रमाणे बदल लागू करण्यात आले आहेत.
जड व अवजड वाहनांना प्रवेश बंद
चाकण, शिक्रापूर व शिरूर मार्गे चाकण-अहमदनगर मार्गावर जाणाऱ्या सर्व प्रकारच्या जड व अवजड वाहनांना प्रवेश बंद करण्यात आला आहे. ही वाहने पर्यायी मार्गांनी वळविण्यात येणार आहेत.
मुख्य वाहतूक बदल
चाकण–शिक्रापूर–शिरूर मार्ग हा मार्ग फक्त अत्यावश्यक सेवांसाठी खुला राहणार असून इतर वाहनांना पर्यायी मार्गांचा वापर करावा लागणार आहे.
वाघोली चौक, पेरणे फाटा, भारतमाता चौक, मोशी चौक या ठिकाणांहून भीमा कोरेगावकडे जाणाऱ्या जड वाहनांना प्रवेश दिला जाणार नाही.
मुंबई–पुणे महामार्गावरून अहमदनगरकडे जाणारी वाहतूक ही तळेगाव–नाशिक फाटा–शिक्रापूर मार्गे वळविण्यात येणार आहे.
नगरकडून पुण्याकडे येणारी वाहने शिक्रापूर–चाकण–तळेगाव मार्गे वळविण्यात येतील.
हलकी व खासगी वाहने
हलकी व खासगी वाहने सकाळी ठरावीक वेळेतच भीमा कोरेगाव परिसरात प्रवेश करू शकतील. विजयस्तंभ परिसरात वाहनतळ मर्यादित ठेवण्यात आले असून, वाहने नियोजित पार्किंगमध्येच उभी करण्याच्या सूचना देण्यात आल्या आहेत.
आपत्कालीन सेवांना सूट
रुग्णवाहिका, अग्निशमन, पोलीस वाहने व अत्यावश्यक सेवा या वाहतूक बदलांतून वगळण्यात आल्या असून, त्यांच्या मार्गात कोणताही अडथळा येऊ दिला जाणार नाही, असे पोलिसांकडून स्पष्ट करण्यात आले आहे.
वाहतूक पोलिसांनी नागरिक, भाविक व वाहनचालकांना निर्धारित पर्यायी मार्गांचा वापर करण्याचे, नियमांचे पालन करण्याचे तसेच अनावश्यक वाहने घेऊन भीमा कोरेगाव परिसरात येऊ नये, असे आवाहन केले आहे. वाहतूक बदलांबाबत माहिती फलक, अतिरिक्त पोलीस बंदोबस्त व मार्गदर्शन पथके तैनात करण्यात आली आहेत.
