**आर्णी / प्रतिनिधी**
आर्णी शहरालगत वाहणाऱ्या अरुणावती नदीच्या पात्रात सध्या कमळाची सुंदर फुले उमलल्याचे चित्र पाहायला मिळत आहे. हिंदू संस्कृतीमध्ये कमळाला अत्यंत महत्त्वाचे स्थान असून देवी महालक्ष्मीच्या पूजेत कमळाच्या फुलांना विशेष मान दिला जातो.
“कमळ चिखलात फुलते” ही म्हण सर्वश्रुत आहे. प्रतिकूल परिस्थितीतही सौंदर्य आणि पावित्र्य जपण्याचे प्रतीक म्हणून कमळाकडे पाहिले जाते. विशेष म्हणजे आर्णी येथील अरुणावती नदीच्या अंतरगाव रस्त्याजवळील नदीपात्रात उमललेल्या कमळांनी नागरिकांचे लक्ष वेधून घेतले आहे.
अरुणावती नदीचे पात्र काही प्रमाणात प्रदूषणाच्या समस्येला सामोरे जात असले तरी अशा परिस्थितीतही नदीत फुललेली कमळे निसर्गाची सकारात्मक बाजू अधोरेखित करतात. नदीकाठून जाणाऱ्या नागरिकांना हे नयनरम्य दृश्य दिलासा देणारे ठरत असून अनेकजण या फुलांचे छायाचित्रण करताना दिसत आहेत.
पर्यावरण संवर्धन आणि नदी स्वच्छतेची गरज अधोरेखित करणारे हे दृश्य निसर्गप्रेमींसाठी आनंददायी ठरत आहे. अरुणावती नदीपात्रात फुललेल्या कमळांनी परिसराच्या सौंदर्यात भर घालत एक वेगळाच संदेश दिला आहे. 🌸
