आर्णीतील 9 वर्षांच्या आहिल महेमूद सोलंकीची प्रेरणादायी कामगिरी; पहिल्याच वर्षी पूर्ण केले 30 रोजे

आर्णी : शहरातील सामाजिक कार्यकर्ते महेमूद सोलंकी यांचे चिरंजीव, अवघ्या 9 वर्षांचा आहिल महेमूद सोलंकी याने आपल्या जिद्द, चिकाटी आणि अटळ श्रद्धेच्या बळावर पहिल्याच वर्षी संपूर्ण 30 रोजे पूर्ण करून एक प्रेरणादायी कामगिरी केली आहे. एवढ्या लहान वयात केलेली ही साधना सर्वांसाठी आदर्श ठरत आहे.
रमजान महिन्यात रोजा ठेवणे हे मोठ्यांसाठीही आव्हानात्मक मानले जाते. अशा परिस्थितीत आहिलने सलग 30 रोजे पूर्ण करत आपल्या बाबांचा रेकॉर्डही मोडला आहे. या कामगिरीमुळे त्याच्यावर कुटुंबीयांसह संपूर्ण परिसरातून कौतुकाचा वर्षाव होत आहे.
आहिलने केवळ धार्मिक कर्तव्य पार पाडले नाही, तर त्यातून संयम, शिस्त आणि आत्मविश्वास यांचे उत्तम उदाहरणही समाजासमोर ठेवले आहे. त्याच्या या कर्तृत्वामुळे इतर लहान मुलांमध्येही प्रेरणा निर्माण होत असून, अनेकजण त्याचे अनुकरण करण्यास उत्सुक आहेत.
आहिलच्या या यशामागे त्याच्या कुटुंबाचे मार्गदर्शन, प्रोत्साहन आणि संस्कार यांची मोठी भूमिका असल्याचे सांगितले जात आहे. सामाजिक कार्यात सक्रिय असलेल्या महेमूद सोलंकी यांच्या कुटुंबात धार्मिक आणि सामाजिक मूल्यांना विशेष महत्त्व दिले जाते, याचेच हे उत्तम उदाहरण आहे.
आर्णी शहरात सध्या आहिलच्या या कर्तृत्वाची सर्वत्र चर्चा असून, त्याच्या जिद्दीचे आणि श्रद्धेचे सर्वजण मनापासून कौतुक करत आहेत. भविष्यातही तो अशाच प्रकारे प्रगती करेल, अशी अपेक्षा व्यक्त केली जात आहे.